天藍，要撞正無落雨，講少少彩數；水清，清成咁，真係要人為努力。喺石垣島，好多紀念品都講明為 save the ocean行動籌款。香港人，無膠袋攞真係唔好用更厚嘅紙袋代替呀！
大遊行
送你一對翼 沖繩石垣島
2009年07月16日去沖繩（ Okinawa），你一定以為又係那霸（ Naha），又係十年如一日的陽光與海灘。正為新唱片宣傳的唐素琪：「那霸？我一年前去過啦！」
那霸去過？我帶隊去石垣島（ Ishigaki），位於那霸西南，屬八重山諸島中最熱鬧的一個。唔單只有得下水，仲可以上埋天落埋地野外飛馳，由朝玩到晚，死未？「嘩，好 high呀！唔記得搽防曬，唔理佢啦！」一生人第一次曬到有少少黑的唐素琪如此說。
俾把大風扇孭上天
我怕高，又怕死，要我玩降落傘或笨豬跳，除非公司先替我買一份賠償額高達 C朗轉會費的保單。
去到位於石垣島北部明石海岸，見到一對對年輕日本情侶坐滑翔機高空遊覽，唔知點解，又唔驚喎，一來天氣好海水清山色綠，風景真係靚到無話好說，二來有個日本教練坐正你後面幫你操控，你基本上只需要坐定定向下望。有個人陪，總係安全啲，無咁 lonely。
真 係咁安全？飛上天 20分鐘，頭 18分鐘齋睇靚景吹吹風，非常寫意，教練怕你悶，臨走醒你連環高速轉動。我開始暈，猛嗌 stop、 stop、 stop。笨！應該嗌 yamete呀！玩完之後的唐素琪：「從高空望番落海面真係好靚，又好穩陣，仲可以自拍，一流！」我的意見是，如果背脊嗰個熱辣辣嘅教練換上綾賴遙或周秀 娜，應該更加正！
滑翔機得兩隻，唔多，最好兩日前 book定。而且，只要有少少雨落都唔會上天。 Yeah, I'm so lucky!
起飛，你幫手跑幾步，沙好滑，唔熱，赤腳都無妨，腳趾靚的話。
上到半空，其實好定，你食個杯麵都唔會成面都係湯。穩陣啲，工作人員提供埋紅繩俾你綁實部 DC，自拍更無難度。
師傅喺山坡草地檢查好器材入滿油，然後落沙灘起飛。日本人，就係贏在呢份認真。
Sky Adventure Woomacoo
營業時間： 09:30-16:30
集合地點：石垣市伊原間 249-42
收費：成人—— 10,000円（$837）；小童—— 8,000円（$670）（包 20分鐘講解 20分鐘上天）
聯絡電話： 0980-88-8101
網址： http://www8.plala.or.jp/woomacoo
用 ATV玩 RPG
做完飛人，做車神。
同行的男新人 Billy一聽見有得玩 ATV，興奮：「嘩，我以前喺拉斯維加斯嘅沙漠都玩過，好刺激㗎！」小朋友，上下左右都係沙，有乜好玩呢？等叔叔帶你感受一下真人版 online game的滋味。喺石垣島，得一處地方有 ATV玩，一處就夠了，沿北部半島一周，揸足三粒鐘，先嚟闊闊馬路爽爽，爽完，踩入亂石堆、草叢、懸崖邊、牧場，沿途欣賞到靚海景，突然有隻馬喺你身邊經 過，又有好多閘門要你落車開，仲唔係 RPG Game？爭在未有怪獸咋！你又知……
最高時速 80km/h，閒閒哋都 40、 50，不過唔使有車牌先玩得，有膽就得。
上石路，唐素琪奉勸少女們諗過先好玩：「玩完成面都係沙泥，而且隻手會好痺。」
途經牧場，你要停車開閘，然後跟馬匹牛隻一齊玩。沿途糞便，幾正，雖然你可能情願通街出前一丁或 Neutrogena。
喺馬路踩，真係幾正。怕唔怕阻住後面車輪俾人響按？你估香港咩？
Buggy Tour Service SIMBA
營業時間： 08:30-17:00
地點：石垣市大浜 2075-152
收費： 12,000円（$1,004）
（包 3小時繞石垣島北部半島一周行程）
聯絡電話： 0980-83-4124
網址： http://www.thida.net/s/simba/
牛蟹雙絕又食又拎
喺石垣島，食乜好？當地人一定推介石垣牛，仲話求其是但搵間有得吃燒肉的，就可以了。
可唔可以唔好咁求其是但？我唔信邪，找來「海 の家族」。特別在於唔只有一般石垣牛，仲有石垣島餐廳中少數提供的美崎牛，即係來自美崎農場的牛肉，一般會運去神戶或松坂，變成最上等最貴價的貨色，少數 留低在原產地的，品質好但價錢平一大截。加埋老闆日日親自上山捉嘅椰子蟹，連唔食牛肉嘅，都有着落了。太子女更細心地炮製蟹餅當手信發售。我對海鮮向來興 趣不大，唔識評價，碟牛就 sorry了，我用咗一分鐘唔夠就掃咗一大碟落肚囉。
Billy捉實嘅椰子蟹，蒸好咗嘅，其他食材就自己慢慢用炭爐火燒。太子女話老豆朝朝上山捉蟹，下午瞓覺，今年六十歲，身體健康。
蟹肉，我覺得實咗少少；牛肉，一致公認無得彈，入口即溶，油香四散，就算嘉士伯賣牛肉，都唔會做到世界上最好。
食蟹，乜都唔好點。食牛，由上到下，日式燒肉醬、石垣鹽、豉油、椒鹽，任揀。試過，勁鹹石垣鹽最正。
可以帶返香港嘅蟹餅，似脆脆蝦餅，一盒賣 1,475円（$123），好過去機場求其買盒黑糖咁囉。
二人分量的套餐， 12,500円（$1,046），有石垣島獨有的魚，有 1kg椰子蟹，有美崎牛，分量其實夠三至四個正常人。
海 の家族
營業時間： 18:30起
地址：石垣市川平 989-2
聯絡電話： 0980-88-2633
網址： http://www.uminokazoku.com
全民投入泳池派對
去旅行，最緊要投入，理得你喺香港做 CEO或者教書，出得嚟玩，唔該唔好咁嚴肅。
所以，入住 Club Med，人都活潑了。私人海灘，包埋三餐自助餐，酒吧任飲， 24小時泳池， OK， fine，撞到正夜晚的 party才是主力推介。住客來自五湖四海，一玩遊戲，立即葉問上身，台灣代表要幫馬英九增光，我們香港來的，唔願幫曾蔭權就當幫黎智英吧。可惜，台灣選 手實在好大隻，苦戰三回合，落水都是我們的 Billy。無所謂啦，黎老闆喺台灣都有生意。
你問問自己，有幾耐未試過發癲？去旅行唔會齋 shopping或瞓低做 spa？都唔講有幾耐未試過跟日本韓國少女用英語加身體語言搭訕了。呢個時候，你應該推你老婆或女朋友返房做 mask或者補濕……
Billy都算大隻仔，但對面那位自稱 Tiger的台灣猛男，真係叫佢一手抬起七袋米都可能得。咁，邊有得玩呀？
如果，玩男女混合戰，我應該第一時間跳入泳池舉手報名參加。
經過我火速嘅掃描，入住者，多數係一家大細，媽媽級。剩低為數不多嘅美女，真係要搶。 May I have your no.? facebook? MSN?
無 party，泳池都開通宵，對於精力旺盛夜晚唔願瞓的人，啱晒。
私人沙灘，沙比想像中粗咗少少，已經好 good了。
房，其實大部分時間我都唔喺自己房。因為 Club Med唔想人客掛住開工， WiFi得大堂有，我要去上網摷料咋，不要過分美化我的工作。
Club Med Kabira Beach
地址：石垣市川平石崎 1
聯絡電話： 3111 9388（香港辦事處）
房租：每晚約 15,000円（約$1,255起）（包早午晚自助餐、娛樂活動）
網址： http://www.clubmed.com.hk/
記得租定車
石垣島話大唔大，話細都唔細。無鐵路，交通就始終有一定困難。強烈建議你拎國際車牌，預先租好車，機場收車，因為當地租車公司規模唔大，隨時乜車都俾人租晒，到時餐餐的士，都幾傷。
5人車款，最多有載到 10人的車款提供。
Orix Rent-A-Car
收費： 5人車日租由 6,825円（$571）起
營業時間： 08:00-20:00
聯絡電話： 0980-83-8543
網址： http://car.orix.co.jp/
花街唔使去
睇石垣島旅遊雜誌、電視廣告，不約而同都有介紹夜生活，話有靚靚少女陪你唱 K。石垣市市中心美崎町被稱為石垣島歌舞伎町，問題係想找尋美少女不容易，我的經驗是你會先被帶去普通 KTV， 3,000円（$251）唱一粒鐘，至有機會上多兩層樓見識見識，然後發現不外如是到極。慳啲使費，落樓下望望要求影影合照好過。
歌手駐場的 KTV，$250一小時，唱日文歌，你有興趣嗎？
採訪當日撞正七夕，日本少女著上和服，禮貌要求影合照，唔會有黑幫衝出來收你錢。
有用資料
簽證：持 BNO或特區護照者均毋須簽證，可享有 90日以內短期逗留。
機票：香港只有直航機前往那霸，前往石垣島，須由那霸機場轉乘內陸 機，費用昂貴兼需時甚長。 Club Med於 5月 9日至 9月 19日期間，提供包機旅遊套票，乘搭國泰航空往台北，再轉乘華信航空直飛石垣島。 4日 3夜套票，每位成人$8,950起， 4至 11歲小童$6,930起，於 7月及 8月期間出發，每位小童更可額外節省$800至$1,000，現預訂套票，兩位成人同行，更只須支付一張機票的價錢，最高可節省$4,300。詳情請瀏覽 http://www.clubmed.com.hk或致電 3111 9388查詢。
市內交通：有巴士（ http://www.cosmos.ne.jp/~bus/index.html），的士起錶 400円（$33），有包的士服務（ http://www.hirata-group.co.jp；電話： 0980-82-6711），但建議租車更划算。
天氣：全年平均溫度約 22℃， 4月至 10月為夏天，溫度約 30℃。 4月至 6月為雨季， 8月至 10月則為風季，天氣最晴朗則為 7月至 9月。
貨幣： 100円約兌 HK$8.3
鳴謝： Club Med
撰文：方俊傑
攝影：劉家銘
插圖：朱桂葉
mailto:nextb@nextmedia.com
FullMagPC (NGPH06)HKNext View 1.0
沒有留言:
張貼留言