租車自駕遊優惠(HK)

唔經唔覺，暑假已經放咗一半，旅行去完、唞又唞夠、連細路啲暑期作業都做完，但仲有流流長一個月，唔搵啲嘢玩點掂！有車人士唔使講都會揸車 四圍去，不過冇車讀者亦未必局限於冷氣商場，事關'09暑期租車公司爆發優惠戰，Avis日租唔使講嘢即8折，仲率先玩加$1續租6折或打爆油缸；大昌租 車部亦狂推5天自駕遊優惠，平均日租喪至$328！新車款方面就更加吸引，Avis誇到連激改波子TechArt Cayenne都有，大昌行又有摺頂Astra Twin Top，Toyota Rent-A-Car就有推出唔夠3個月的最新Hybrid王第3代Prius，莫講話冇車人士抵租，直頭連車主都想租嚟玩！

今 時今日仲死慳死抵養一星期先揸得嗰幾粒鐘的holiday car，絕對係傻！事關租車公司已經普及多年，只要你夠25歲有2年牌，即可拎住3個月內的住址證明租車去，完全唔使煩牌費、保險同維修，幾嚿水1 day已經可以唔使忌錫玩盡靚車，而且鍾意幾時換車都得！絕對係只為放假揸車四圍遊的讀者首選。所以今期就會格盡五花八門最新租車優惠，搵出不同類型、不 同車種租車至抵價！

Round 1　夠信心！鬥車款
好多人咁耐都唔敢租車玩，除咗怕咗香港變態交通，最驚就係去咗屈 檔俾人狂屈維修同附加費！不過其實好多香港租車公司都係大集團旗下，租車絕無鑊氣兼收車時唔會驗屍咁驗。就好似今次介紹4間大型租車公司咁，大昌行代理品 牌由Honda至Bentley有成7個，車輛質素絕對有保證；而Avis同Toyota Rent-A-Car更加係國際性租車集團，後者又係香港Toyota、Lexus同Mazda等代理，同樣信心爆燈；至於大聯合則係本地最大型獨立租車 公司，老闆更加係右軚商會主席，總之任何一間都咁穩陣，第1 round即鬥佢哋有乜特別服務同新車款！

「Avis」 贏 方便又好玩！
基 本上4間租車公司租車條款、方式全部一樣，雖然講規模最大一定係大昌行，但講租車方便就以設有兩個租車交車點（尖東、灣仔）的Avis最好。而且講車款都 係Avis最吸引，波子、Benz跑、Mini開篷及光岡等咩類型玩樂車種都有，冇其他公司啲車款咁悶。不過值得一提係Toyota Rent-A-Car有Hybrid車租，慳油之餘仲可以畀人長期體驗Hybrid車係乜東東，有意換車的車主好應該試試。不過呢part鬥車款鬥方便， 始終都係Avis稍勝一籌！

Round 2　自家玩！鬥So價
得閒先租吓車玩，相信好多人都唔會理邊間公司大啲、方便啲，最緊要租平兼車款實用，即鬥家庭房車類別收費加優惠！

各擅所長和
純 以日租計租，平盡家庭車大聯合以$570大勝其他3個對手，不過要留意大聯合車款比較舊，若然要出街威寧願畀貴啲同Avis租，因為Avis現時有暑假優 惠，首次幫襯日租有8折，折後畀$608就有勁多新車款揀。Weekend租方面，其實4間公司收費相差唔過$500，其中又以大聯合的$1,300最 平，而且星期一還車最遲去到11:00。若果想玩足一星期，一樣係大聯合$2,500最平。不過大昌行暑期有星期一至五閒日長租優惠，只收$1,640， 平均每日只需$328，雖然比其他公司週租玩少星期六、日2日，但已經非常抵玩。

Round 3　合家歡！鬥租MPV
三 代同堂去郊遊或結婚要載兄弟姊妹，車仔啲租平極都冇用，冇部7、8人MPV點掂？雖然3間最大租車公司最豪都有Alphard或Elgrand等頂級 MPV，不過租次一級已經好舒服的Previa或Odyssey就平成30%至40%，所以呢round集中鬥呢類中型MPV同最平入門級MPV的租車 價。

載多幾個揀「Toyota Rent-A-Car」
由於Avis日租有8折，所以無論租入門級或中級MPV都最 平，折後只需$760/$840。大聯合租Picnic和Previa雖然都拍得住折後的Avis租車價，但要留意佢哋部Picnic同Previa都係 上代款。唔計用舊款車的大聯合，Weekend租方面就以Toyota Rent-A-Car同Avis一樣以$1,900租入門級MPV最抵，不過租中級MPV就Avis平Toyota Rent-A-Car $100。最後計埋週租，租入門MPV以Toyota Rent-A-Car最平，不過租中型MPV就3間都係$4,800，但Avis加$1送多缸油so啲，不過整體而言，租新款MPV都係Toyota Rent-A-Car抵啲！

Round 4　搬運用！鬥租Van
若然你兄弟多，家當又唔多，連搵搬屋公司錢都想慳，自租van走多兩轉最實際，即格租van價。

「大聯合」4日租抵爆！
大 昌行、Avis同Toyota Rent-A-Car全部用晒最新款Hiace兼有自動波揀，價錢更鬥得不分上下。不過用嚟搬嘢揸咁靚部車有鬼用咩？所以雖然大聯合仲租緊舊款千禧版 Hiace，但日租只收$290，不過一租就要租4日以上，總收費$1,160，如果用得着，固然之平過其他公司週末租同星期租幾百蚊，但就算用唔着，租 足4日都只係貴大昌行同Toyota Rent-A-Car的$720日租$440，分開慢慢搬之後再遊吓車河都仲大把時間，價錢絕對win晒！

總結：不同性格自己揀
睇 勻以上幾round格價，其實4間租車公司價錢都好接近，不過就各有不同賣點。後生仔女必揀Avis，因為車款全部夠另類好玩；慳家一族純粹為需要而租 車，則一定揀最平大聯合；想試試Hybrid新科技車及凌志靚車就可以揀Toyota Rent-A-Car；最後去車款數目及種類最齊的大昌行，就唔怕遲租車租唔到心水車種類型。

租車時想快手啲攞靚車，用家可要求租車公司先fax份資料畀你填及影印定身份證、車牌，攞車前將所有資料fax番畀佢哋，咁就最慳時間。

大昌行（2768 2277）
Avis（2890 6988）
Rent-A-Car（2880 1515）
大聯合（2309 1333）

最型嘅Cayenne TechArt Version，租1日就要$2,950，一個weekend就要$6,100。

Opel Astra Twin Top

全新Toyota Prius

租車同還車時，4間公司都會同客人一齊check車，檢查租車前後的車輛內外狀況。

大昌行、Avis及Toyota Rent-A-Car都有Previa，豪華舒適度其實拍得住Alphard。

租車時要留意，取車時基本上部車一定滿油，還車時用家亦必須入番滿缸油，冇入滿租車公司除會收番你油錢外，更會額外收你$50至$80手續費。

大聯合汽車的Danny說公司有大量van仔出租，雖然不是新車款，但用足全日除開$290日仲平過你叫客貨車。